落街搵貓,剛好跟一對mk仔女同,直到出都係行同一個方向。

望住佢地,令我諗返起好多野。。。
亦突然令我好掛住啲Design朋友、PC、冰山同Rachel。
 
對mk仔女特登打扮過、著到好靚就係為左十一點幾落街見朋友,個女仔見到女仔friend即刻熊抱、勁開心。成班人旁若無人咁。
 
真係好似曾相識。
雖然我到最後先發現原來得我一廂情願。
 
小五小六開始注重外表,即打扮啦。
其實我由細個開始都好鍾意搵role model,特別係著衫。
我唔係標準靚女,係白、手腳偏長、身型纖細,某程度上就係細粒版既高加索身型。
所以一直都知道走日系路線就啱喇,因為真係日本衫size先啱。
而且果時又鍾意粉色同可愛既野。
高中時定位都係靜、睇書、畫畫既作家feel女生。
直到同櫻男拍拖。。
諗返都知自己on9,竟然轉走蘿莉妹系風。。簡直柒出宇宙差啲返唔到轉頭,真係勁樣衰。
Ok,事情已完,我知道自己係溫柔既姐系就夠。你鍾意妹妹就妹飽佢,我始終係人地家姐,first born child唔係我想,咁都要俾人扣分,你不如同虛擬人物拍拖啦,啲萌點你可以自己set既。
 
到後來金牛女(話說我真係同所有土象星座都唔夾😎)介紹mk勇我識,第二次轉型。因為分手後想改變自己,重新做人,佢地又好神心咁話陪我行街改變造型,點知。。。
金牛女就背後同mk勇罵我行街揀野揀好耐。。。其實我唔介意即時提出陪你行返你想行既野,如果唔係mk勇同我講,我真係唔知道原來你唔鍾意咁樣。不過金牛女由細到大都係咁,無論你係佢朋友定情人、發生咩事都好,你永遠都係第三者口中得知。而且佢好鍾意同啲外人講完有咩不滿,叫啲外人去話返你。佢又好得意架喎,成日吸引到啲騎呢怪但又唔拒絕人,唔係叫我就係叫mk勇幫佢擋。
於是,我以後都唔約佢行街喇。
mk勇就介紹左好多地方同我去行,可惜我唔係mk妹,任何mk野係我身上根本唔襯,當然俾佢歸咎於我果時肥同唔靚啦。
我又偏向鍾意日系野,結果佢成日都好多批評,但我跟佢意見買野,佢又覺得唔啱。
 
直到識到天秤男,我打扮既啟蒙導師。
最記得佢講,女人打扮係俾男人睇,每當有任何女人批評你,你就知道你著啱衫。
佢帶我真正行街、襯衫、拉直頭髮、換眼鏡。
令我慢慢明白自己有魅力既地方係邊,成日叫我要有自信。
大執之後,身邊既人越黎越多。
我先知道,原來有人鍾意日系架。
原來係某啲人眼中我係值得去鍾意並交往,唔再只係被踐踏既肥妖怪、阿嬸。
 
呢樣野令我明白到:
1)你係日系女仔就做返個日系女仔,就算你點樣扮mk妹都唔會似,mk仔都係唔會欣賞你。
況且你唔係想揀mk仔嘛?
2)行街買衫就同啲有質素、有異性緣既男性朋友行,佢地會知男人鍾意啲乜、一定俾到有用既意見你。
3)與其不斷去模仿,不如搵下自己有魅力既地方係邊。
4)咩衫同化妝都要去試,唔擺係自己身上點知效果?
5)唔需要太在意批評,你打扮唔係為左討好佢。
 
想寫呢一類既野好耐,小試牛刀。
大家睇完快啲去扮靚靚啦~
 
創作者介紹

Rabbit Ciel

諾維爾 發表在 痞客邦 PIXNET 留言(0) 人氣()